STURRIDGE KAN TA A NI TA

Chelsea striker Daniel Sturridge chu kan la fel ta. A man hi Official-a puan chian a ni lo na a, pound maktaduai 12 vel niin sawi a ni a. Kar khatah pound 57,000 a hlawh dawn niin sawi a ni bawk.

Kum 23 a upa Sturridge hi goal khung thei tak a ni a, a inhliam avang leh Torres-a a luh tak avangin Chelsea-ah hian hmun a chang hnem thei lova. Brendan Rodgers hian Luis Suarez hi number 10 role pein, goal khungtu ni lovin, goal khungtu tur tana space leh assist siam turin a duh a, Sturridge hi kan goal khungtu tur a ni dawn ni awm tak a ni.

Sturridge hian jersey number 15 a ha ang.


DANIEL STURRIDGE HRE CHIANG RAWH:

1. Daniel Sturridge hi 1989 khan Birmingham khuaah a piang a. Aston Villa leh Coventry Football Club-ah te hun a hman hnuah, 2003 khan Manchester City Youth Academy-ah a lut.

2. Sturridge hi football khel thin chhungkua atanga lo zi chhuak a ni a, Derby leh Wolves striker thin - Dean Sturridge kha a nu unaupa a ni.

3. 2007-08 season khan Youth FA Cup, FA Cup (tak tak) leh Premier League-ah goal khung vekin, hetiang ti thei hmasa ber leh awmchhun a ni.

4. 2009-10 FA Cup ah khan goal 4 khungin Chelsea tana goal khung hnem ber a ni a, final-ah Portsmouth hnehin, Chelsea chu double champion (with Premier League) a nihpui a nih kha.

5. January 2011 khan Bolton-ah loan-in a chhuak a, Wolves, Tottenham, Everton leh Newcastle lakah, a zawnin goal a khung a, Premier League-ah, club thar tana game hmasa pali-a goal khung vek thei player parukna a ni.

6. Sturridge hian central striker bakah wing-ah a khel thei.

7. 2011-12 season-a a khelh hmasak berah, Sunderland lakah back-heel mawi tak a khung. Hei hian sawi a hlawh hle.

8. Sturridge hian U-16 atangin age level zawng zawngah England tan a khel kim vek.

9. Premier League, Champions League leh FA Cup (vawi 2) winners' medal a dawng tawh.

10. Sturridge hi Stuart Pearce chuan London Olympics-ah khan Great Britain Olympic football team, mi 18 awmnaah a thlang tel ve a, goal hnih a khung.

Ngam tak ani !!

Suarez An Hrem Dawn Ta Nge Nge

FA hnuaia Independent Regulatory Commission chuan Liverpool striker Luis Suarez chu Patrice Evra laka tawngkam mawi lo a hman avangin first team match 8 khel thei lo tur leh pound sing li (40,000) chawi turin a chungthu an rel.

October ni 15, 2011 a Liverpool leh Manchester United inkhelh tum khan United captain Evra chuan Suarez hian tawngkam mawilo takin vawi tam a ko nawmnawh tiin a puh a. November ni 16-ah FA chuan Suarez hi FA Dan No. E3 hmangin thubuai an siamsak a. December ni 14-20 chhungin Independent Regulatory Commission chuan hearing a nei a, December ni 20 ah IRC hian an thutlukna an puang a, Suarez hi hrem tur a nih thu an puang ta a ni.

IRC chuan, 'Suarez hian FA Rule E3(1) kalhin Evra hi tawngkam mawi lo takin a tawngkhum a, a tawngkamah hian Evra vunrawng vanga hmuhsitna a tel a, chu chu Rule E3(2) kalh a ni bawk a. Chuvangin Suarez hi a nungchang chungchangah vaukhan tur a ni a, match riat chhung khel thei lova hrem a ni ang a, hei hin first team competitive match a huam ang a, pound 40,000 a chawi bawk ang,' an ti.

Suarez leh Liverpool club hian he thutlukna hi an khin let phalsak an ni a, ni 14 chhung hun pek an ni a, chumi chhung chuan Suarez hi hrem a ni dawn lova, an khin letna hi Court-a chinfel a nih hma chuan Suarez-a chungah hian hremna lekkawh a ni lo bawk ang.

He thutlukna puan a nih ve leh hian Liverpool Football club hotute chuan an thinrim thu an sawi ve nghal a. Thuchhuah siamin, "FA hian hearing an neih hma atang tawh khan Luis Suarez hi hrem an tum hrim hrim niin kan hria. Luis hi kan theihtawkin kan tan tlat dawn a ni," an ti a, an thusawi atang hian awm mai mai an tum lo tih a lang sa khawp mai.

Suarez pawhin, "Kei leh ka chhungte tan chuan vawiin hi hun hrehwm tak a ni. Min tantute chungah lawmthu ka sawi e. Chi inthliarna hi ka hua a, tute pawh hi ka zah vek a, kan inang vek tih hi ka pawmdan a ni," a ti ve bawk.

Liverpool thuchhuahah bawk kir leh ila, "Liverpool FC chu he thutlukna hian a barakhaih hle a. Patrice Evra tawngka atang ringawta Luis thiam loh chantir a ni hi thil mak danglam tak a ni. Field chhungah khan midang an awm ve teuh a, Evra thiante pawh an awm a, mahse tumahin Luis-a tawng kha an hre lova, referee pawhin a hre hek lo. LFC hian chi inthliarna hi a do reng a, Luis hian engmah chi inthliarna zawngin thil a ti lo tih hi kan pawmdan a ni. He player pakhatin Luis a puhna hi a tling tawk kan ti lova, amah ngeiin FA hnenah, 'Suarez hi chi inthliarna la vung chi a ni lovin ka hria,' ti-a ziaka a thlen khan engkim a hrilhfiah a ni. Luis ngei pawh hi a pa mihang a ni a, Uruguay-ah leh hmun dangah pawh mihangte nen an inkhelho fo tawh a, a chunga hetiang thil a thleng hi a mak takzet a ni," an ti.

Liverpool chan Evra pawh hi hrem ngei chi niin an hria a, "Evra pawh hian Luis Suarez hi \awngkam tuitang lo tak hmangin a tawng khum tih a inpuang a, hei hi eng angin nge FA hian an ngaih dawn kan hre chak a ni," an ti a. "He thutlukna kimchang hi kan zir chiang ang a, hma kan la ve ngei ang," an ti bawk.

Hetih lai hian Manchester United thupuangtu chuan, "FA thutlukna chungchangah hian sawi tur kan nei lo," an ti thung.

Professional Footballers Association Chief Executive Gordon Taylor chuan FA thutlukna hi an thlawp thu a sawi a, hremna chungchang erawh a na deuh ni-a a hriat thu a sawi thung a. Anti-Racism pawlte pawhin an thlawp tih an puang bawk.