1998 World Cup-ah khan Argentina defender-te pal darh vekin goal ropui lutuk a rawn khung a. Khata tang khan England striker chhuan tawlawl a ni reng a. A chet chhiat eng ang lai leh goal a khung theih lohva sawisel a hlawh lai pawhin amah chawilar a, hetiang dinhmun a thlen theih nana engkim petu Liverpool Club-ah chuan eng lai pawhin, a dam that phawt chuan a ‘start’ char char a. Amaherawhchu a ni ang ‘quality striker’ khan Champions League lallukhum khum lova zuih ral mai hlauh kha thil awm tak a ni reng a. Chawimawina no mawi lian zawk beiseiin, amah siamlian a, ui ngawih ngawihtu Liverpool chhuahsanin khawvela club ropui ber, Champions League trophy vawi 9 chawi tawhtu Real Madrid a zawm a, a chan chu kan hria e.
A kalsan tak Liverpool chuan a tel lovin Champion no mawi chu Anfield-ah an hawn a. A ni, Owen-a pet goal tel miah lovin Champions League lallukhum kha an khum a nih kha! Real Madrid tan goal 16 a khung a, chu chuan a dinhmun a siamtha chuang lo. ‘Galacticos’ ah chuan ani ang striker thawm zawi, lar chung pawha lar leh zel dan thiam ve lo tan chuan hmun a awm lova. Hnim hring tha zawk beiseia a tlanna ram atang chuan Anfield ngaiin a kur a, mahse Liverpool chuan an duh bik lo! Kum hmasa lawka pound maktaduai 8 a an hralhchhuah kha pound maktaduai 17 in an ngam a nih pawhin, Carlsberg leh Owen-a hmel inhmeh ti em em thintu mihring maktaduai tam takin ‘phatsantu’ tia an sawi ‘Micky’ hi an la let leh ngam lo a ni ang. Newcastle-ah a luh a ngai ta nge nge a nih hi!
Ni e. Khatia Owen-a’n Anfield lamah a puanthuah rawn put luh leh a tum thuthang a awm rual khan kei, India hmarchhak kil tawpa mi In luaha khawsa ve mai mai chunga Liverpool tan rum rut hian Liverpool website-a member ka nihna hmang tangkaiin ‘Forum’ ah Owen-a chungchang ngaihvenin mi titi ka ngaithla kual a. Tam takin duh mahse Liverpool tantu tak tak, a ruhkawlte chuan a lo let leh an phal thei lo. A duh lohva a chhuahsan tak kha Real lamah hmun a chan mumal tak loh avanga rawn ngai thar lehin, an fachuam anga enkawl leh turin a beisei an phal lova, ‘A tel lo pawhin khawvela football competition sang ber Champions League-ah pawh kan champ’ thei’ an ti tlat. Kei ve ngial pawhin chu thu chu ka rilrem zawng tak a ni a. Anfield-a a lo let leh phallotu zingah ka tel ve. Ka saptawng thiam zawng zawng bakah mi sawi ka hriat ang angte fawmkhawmin, a lo let ka duh loh thu chu ka ‘post’ ve nghe nghe.
Ka rilruah chuan Owen hi a hlui ngai lo. Sunderland nen an inkhelh tuma Steven Gerrard-a’n centre half atanga ball a pek, defender pahnih inkar atanga lo la a, a pet goal tak laite, Arsenal defender-te bum fai veka keeper angle kharna lam khera a pet goal laite pawh ka mitthlaah hian a cham reh thei lo. Mahse, a mimal hmakhua a ngaih avanga a kalsan tak, a vahbosanna lama hlawhchhama rawn haw leh lo tuamhlawm kha Liverpool tih tur a ni kher lova, an ti ta lo reng a ni.
Northeast England-a club lian leh hlun, Newcastle Utd. jersy tial, a hnunga No. 10 inziak haa Owen-a hmuh hi Liverpool fan diktak tan chuan thil nuam a ni lova, rilru zawng a nuam lo chiang. Mahse hmangaihte ngaihdam hi thil har ber a ni.
Anfield-ah rawn zinin, goal pawh a rawn khung a ni thei a. Amah avangin Newcastle hi Liverpool hian season tawpah tluk lo pawh ni se, Liverpool ruhkawlte chuan pawi an ti chuang lovang. Mihring avanga club tan thlak mai mai hi mihring dik tak tihdan a ni ve si lova!
[ ziah hun vel chu Liverpool tantute chuan in hrethiam mai awm e. Tualchhung chanchinbua chhuah tura ka ziah a ni a, ka tidanglam lova, hriatthiam loh in nei a nih pawhin mak ti lem suh u. :)]
A kalsan tak Liverpool chuan a tel lovin Champion no mawi chu Anfield-ah an hawn a. A ni, Owen-a pet goal tel miah lovin Champions League lallukhum kha an khum a nih kha! Real Madrid tan goal 16 a khung a, chu chuan a dinhmun a siamtha chuang lo. ‘Galacticos’ ah chuan ani ang striker thawm zawi, lar chung pawha lar leh zel dan thiam ve lo tan chuan hmun a awm lova. Hnim hring tha zawk beiseia a tlanna ram atang chuan Anfield ngaiin a kur a, mahse Liverpool chuan an duh bik lo! Kum hmasa lawka pound maktaduai 8 a an hralhchhuah kha pound maktaduai 17 in an ngam a nih pawhin, Carlsberg leh Owen-a hmel inhmeh ti em em thintu mihring maktaduai tam takin ‘phatsantu’ tia an sawi ‘Micky’ hi an la let leh ngam lo a ni ang. Newcastle-ah a luh a ngai ta nge nge a nih hi!
Ni e. Khatia Owen-a’n Anfield lamah a puanthuah rawn put luh leh a tum thuthang a awm rual khan kei, India hmarchhak kil tawpa mi In luaha khawsa ve mai mai chunga Liverpool tan rum rut hian Liverpool website-a member ka nihna hmang tangkaiin ‘Forum’ ah Owen-a chungchang ngaihvenin mi titi ka ngaithla kual a. Tam takin duh mahse Liverpool tantu tak tak, a ruhkawlte chuan a lo let leh an phal thei lo. A duh lohva a chhuahsan tak kha Real lamah hmun a chan mumal tak loh avanga rawn ngai thar lehin, an fachuam anga enkawl leh turin a beisei an phal lova, ‘A tel lo pawhin khawvela football competition sang ber Champions League-ah pawh kan champ’ thei’ an ti tlat. Kei ve ngial pawhin chu thu chu ka rilrem zawng tak a ni a. Anfield-a a lo let leh phallotu zingah ka tel ve. Ka saptawng thiam zawng zawng bakah mi sawi ka hriat ang angte fawmkhawmin, a lo let ka duh loh thu chu ka ‘post’ ve nghe nghe.
Ka rilruah chuan Owen hi a hlui ngai lo. Sunderland nen an inkhelh tuma Steven Gerrard-a’n centre half atanga ball a pek, defender pahnih inkar atanga lo la a, a pet goal tak laite, Arsenal defender-te bum fai veka keeper angle kharna lam khera a pet goal laite pawh ka mitthlaah hian a cham reh thei lo. Mahse, a mimal hmakhua a ngaih avanga a kalsan tak, a vahbosanna lama hlawhchhama rawn haw leh lo tuamhlawm kha Liverpool tih tur a ni kher lova, an ti ta lo reng a ni.
Northeast England-a club lian leh hlun, Newcastle Utd. jersy tial, a hnunga No. 10 inziak haa Owen-a hmuh hi Liverpool fan diktak tan chuan thil nuam a ni lova, rilru zawng a nuam lo chiang. Mahse hmangaihte ngaihdam hi thil har ber a ni.
Anfield-ah rawn zinin, goal pawh a rawn khung a ni thei a. Amah avangin Newcastle hi Liverpool hian season tawpah tluk lo pawh ni se, Liverpool ruhkawlte chuan pawi an ti chuang lovang. Mihring avanga club tan thlak mai mai hi mihring dik tak tihdan a ni ve si lova!
[ ziah hun vel chu Liverpool tantute chuan in hrethiam mai awm e. Tualchhung chanchinbua chhuah tura ka ziah a ni a, ka tidanglam lova, hriatthiam loh in nei a nih pawhin mak ti lem suh u. :)]
0 comments:
Post a Comment