Ka sawi tawh a, ka sawi zel maithei. Kenny Dalglish hian Liverpool team-ah hian chak duhna thinlung a rawn tuh niin ka hria. Houllier-a leh Benitez-a hnuaiah khan kan player-te khan 'chak duhna tak tak thinlung' an nei lovin ka hre thin a. Sorkar hnathawk zelthel, hlawh lak nan chauhva thawk ang hi ka tehkhin thin. Hemi chungchangah hi chuan Sir Alex Ferguson-a hi ka fak. English an ni emaw ni lo emaw, a player lakluhte thinlungah hian Manchester United hmangaihna a tuh tlat thei zel a. Chak hi an tum em em niin ka hmu thin - ka awt thin.
Fernando Torres-a pawh kha player tha chungchuang a ni tih ka pha lo. Mahse, engemaw chang kha chuan a thatchhia a. Box chhungah a hlauhawm viau rualin, box chhung panna tura ball khalh kha a thatchhia a. Ball a zawng peih lo leh tlat thin.
Manchester City-a a khelh lai atang tawh khan Joey Barton-a talent hi ka awt tawh. A thinchhiat a reh ve tan atang phei hi chuan ka awt takzet. Tun season-a, Carroll-a kan lei hma, nikum December thla 3-1 a min hneh kha i la hria em? Khami tuma Barton-a ball sem thatzia kha i lo hmu ngei ang. Khami tumte khan, a thinchhiat chhuak se, red card hmu se ka ti khawp a. Chuti a hnehin, a khel tha em em tluanchhuak zak a nih kha.
City atanga pound maktaduai 5 leh nuai 8 in an lei kha Newcastle hian an hralh phal kher lo maithei a. Mahse an hralh phal loh hi lei theih loh an ni kher lova. Carroll pawh kan leisak mai kha.
Tunah hian Kenny Dalglish hian Barton hi pound maktaduai 5 velin lei a inbeisei niin sap chanchinbute chuan an ziak a. Hetiang zat leka a lei thei a nih chuan kei, ka duh khawp mai. Kum 28 a upa, fit nga leh inchi sawmpakhata sang, chak leh ball thiam si, English a nih mai bakah, Liverpool-a piang a lo ni kher kher hian ka duh a tizual a. A talent hi kan hman tangkai theih ka beisei a. Carroll-a nen an inmanzia kan hria a, Carroll-a'n Newcastle tana goal a khung zinga pariat kha Barton-a siamsak hi a ni tlat.
Dalglish hian Blackburn player Phil Jones te, Blackpool captain Charlie Adam te, Aston Villa player Ashley Young leh Stewart Downing te bakah Ipswich-a khel Connor Wickham te a beisei mek niin an sawi bawk a. Liverpool-ah hian English player hlir khelhtir a tum deuh emaw tih hial tur a ni.
Season thar bul kan tan hmaa player paruk vel kan lei thei a nih a, tuna kan beiseite hi kan lalut thei a nih chuan season tharah chuan kan tawrhhlelhawm ve viau maithei a ni.
1 comments:
Barton hi chu ka duh khawp mai keipawh. Dirk Kuyt nen hian an inkawp rem viau dawn a hriatna ka nei tlat. An taima dun a, striker ten ball an hmu tam thei dawn. Tun dinhmuna Carroll-a harsatna ber chu high ball a duh ang a hmu theilo hi ani. Suarez hi ground ball ah a hlauhawm em em a, air leh ground a hlauhawm striker pahnih kan nei ani. Air ball a kan harsatna hi Joey Barton hian a solve theih ka ring tlat
Post a Comment