Suarez An Hrem Dawn Ta Nge Nge

FA hnuaia Independent Regulatory Commission chuan Liverpool striker Luis Suarez chu Patrice Evra laka tawngkam mawi lo a hman avangin first team match 8 khel thei lo tur leh pound sing li (40,000) chawi turin a chungthu an rel.

October ni 15, 2011 a Liverpool leh Manchester United inkhelh tum khan United captain Evra chuan Suarez hian tawngkam mawilo takin vawi tam a ko nawmnawh tiin a puh a. November ni 16-ah FA chuan Suarez hi FA Dan No. E3 hmangin thubuai an siamsak a. December ni 14-20 chhungin Independent Regulatory Commission chuan hearing a nei a, December ni 20 ah IRC hian an thutlukna an puang a, Suarez hi hrem tur a nih thu an puang ta a ni.

IRC chuan, 'Suarez hian FA Rule E3(1) kalhin Evra hi tawngkam mawi lo takin a tawngkhum a, a tawngkamah hian Evra vunrawng vanga hmuhsitna a tel a, chu chu Rule E3(2) kalh a ni bawk a. Chuvangin Suarez hi a nungchang chungchangah vaukhan tur a ni a, match riat chhung khel thei lova hrem a ni ang a, hei hin first team competitive match a huam ang a, pound 40,000 a chawi bawk ang,' an ti.

Suarez leh Liverpool club hian he thutlukna hi an khin let phalsak an ni a, ni 14 chhung hun pek an ni a, chumi chhung chuan Suarez hi hrem a ni dawn lova, an khin letna hi Court-a chinfel a nih hma chuan Suarez-a chungah hian hremna lekkawh a ni lo bawk ang.

He thutlukna puan a nih ve leh hian Liverpool Football club hotute chuan an thinrim thu an sawi ve nghal a. Thuchhuah siamin, "FA hian hearing an neih hma atang tawh khan Luis Suarez hi hrem an tum hrim hrim niin kan hria. Luis hi kan theihtawkin kan tan tlat dawn a ni," an ti a, an thusawi atang hian awm mai mai an tum lo tih a lang sa khawp mai.

Suarez pawhin, "Kei leh ka chhungte tan chuan vawiin hi hun hrehwm tak a ni. Min tantute chungah lawmthu ka sawi e. Chi inthliarna hi ka hua a, tute pawh hi ka zah vek a, kan inang vek tih hi ka pawmdan a ni," a ti ve bawk.

Liverpool thuchhuahah bawk kir leh ila, "Liverpool FC chu he thutlukna hian a barakhaih hle a. Patrice Evra tawngka atang ringawta Luis thiam loh chantir a ni hi thil mak danglam tak a ni. Field chhungah khan midang an awm ve teuh a, Evra thiante pawh an awm a, mahse tumahin Luis-a tawng kha an hre lova, referee pawhin a hre hek lo. LFC hian chi inthliarna hi a do reng a, Luis hian engmah chi inthliarna zawngin thil a ti lo tih hi kan pawmdan a ni. He player pakhatin Luis a puhna hi a tling tawk kan ti lova, amah ngeiin FA hnenah, 'Suarez hi chi inthliarna la vung chi a ni lovin ka hria,' ti-a ziaka a thlen khan engkim a hrilhfiah a ni. Luis ngei pawh hi a pa mihang a ni a, Uruguay-ah leh hmun dangah pawh mihangte nen an inkhelho fo tawh a, a chunga hetiang thil a thleng hi a mak takzet a ni," an ti.

Liverpool chan Evra pawh hi hrem ngei chi niin an hria a, "Evra pawh hian Luis Suarez hi \awngkam tuitang lo tak hmangin a tawng khum tih a inpuang a, hei hi eng angin nge FA hian an ngaih dawn kan hre chak a ni," an ti a. "He thutlukna kimchang hi kan zir chiang ang a, hma kan la ve ngei ang," an ti bawk.

Hetih lai hian Manchester United thupuangtu chuan, "FA thutlukna chungchangah hian sawi tur kan nei lo," an ti thung.

Professional Footballers Association Chief Executive Gordon Taylor chuan FA thutlukna hi an thlawp thu a sawi a, hremna chungchang erawh a na deuh ni-a a hriat thu a sawi thung a. Anti-Racism pawlte pawhin an thlawp tih an puang bawk.

Football Association chuan Liverpol striker Luis suarez chu Manchester United defender Patrice Evra lakah chibing inhmuhsitna tawngkam hmanga puh a nih angin a thubuai an siamsak. Liverpool chuan an star striker hian he thil hi a tih loh thu a sawi tih an puang a, an tan tlat dawn tih an puang nghal bawk.

October ni 15 khan Liverpool hian United hi Anfield-ah an lo mikhual a. An inkhelh zawh hnu lawkah Evra hian French TV station 'Canal Plus' ah Suarez hian vawi 10 chuang mihang a nih avangin hmusit takin a tawng khum niin a sawi a. FA chuan hemi chungchang hi ngun taka chhui zelin, Suarez hi thubuai an awrhtir ta nge nge a. Thiam loh a chang a nih chuan hrem emaw chawitir emaw a ni ngei ang.

FA chuan thuchhuah siamin, "October ni 15 2011-a Liverpool leh Manchester United-te inkhelh tuma thil thleng avangin FA chuan Liverpool player Luis Suarez chu thubuai a awrhtir a. Suarez hian Manchester United player Patrice Evra lakah FA Dan kalhin tawngkam a hmang ngeia ngaih a ni. Hei hi Patrice Evra chi leh a vun rawng kaihhnawih thil niin a lang bawk," an ti.

Liverpool chuan international duty-a thang bo mek Suarez hi an club-a a in report ve leh hemi chungchang hi sawipui an tum tih an sawi a. Thuchhuah an siamah chuan FA atangi hriattirna an dawng tawh a, an lehkha dawn chu ngun takin an zir chiang dawn thu leh Suarez hian hetiang thil a tih loh thu a sawi tawh thu leh a lamah an tan tlat dawn thu an sawi ve nghal a ni.

Suarez chuan tun thla tir lam khan Uruguay media-te hmaah mihang a nih avanga hmuhsitna tawngkam a hman loh thu a sawi a, "Hmuhsitna tawngkam ka hmang lo, Manchester United-a a khelhpuite koh danin ka ko a, a thiante pawhin khatia ka ko a hua kha mak an ti hial a ni," a ti ve bawk.

Hotupa A Thinrim

Boss Kenny Dalglish chuan FA in Premier League leh Carling Cup (League Cup) khelh dan tur a ruahmanah Liverpool chuan darkar 48 chhungin game 2 an khelh dawn avangin FA fixture siam dan a sawisel. November ni 27 hian Liverpool chuan Premier League-ah Manchester City an tum dawn a. Chumi hnuah, Thawhlehni-ah League Cup quarter-final match khel lehin, Chelsea an tum dawn a ni.

Dalglish chuan, "Tun ang hunah hetianga player-te kheltir hi a hun tawh lo. League game khelh hnu darkar 48 ah quarer-final khelh leh nghal hi player-te tan a vanduaithlak a ni," a ti a. "Football League thuneitute hian anmahni competition siam ngei hi tih hlut loh an hlau lo a nih chuan an thu a ni," a ti deuh hmak bawk.

Hetih lai hian FA lam chuan Liverpool leh Chelsea inkhelh hun hi Nilai zanah sawn duh viau mahse, London-ah tho Tottenham chuan Europa League-ah PAOK Salonika an mikhual dawn avangin Police an indaih loh an hlau a ni.

Dalglish erawh a lungawi thei lova, engemaw chu tih theih awmin a ring tlat a. "Spurs leh PAOK inkhelh tur avang hian, keini inkhel leh ta ila Police an indaih lo thei ang tih chu a rinawm a, mahse football thuneitute hian player-te hi an ngaihtuah ve a ngai a ni," a ti a. FA hnenah an inkhelh hun hi sawn hnung tura an ngenna a hlawhchham hnuah hetiang thu hi sawiin, "FA kan ngen tawh a, mahse kan inkhelh hun hi an sawn thei lo. Hetiang a nih tak avang hian kan fans-te hnenah, League Cup kan khelh hun tur ticket an lei dawnin ngun taka inngaihtuah turin ka chah duh a ni. Kan hun a inhnawh tawt em avangin player naupang hlir kan khelhtir dawn a, chutiang chu an en duh leh duh loh inngaihtuah se tha ka ti. An fixture siam dan avang hian player naupang kan khelhtir a nih pawhin Football League hi an vui thei lovang," a ti hmiah bawk.

Liverpool nen an inkhelh zawh hnu darkar 48 ah Manchester City pawh hian Arsenal an khel ve leh dawn a, anni pawh hian an duh lo khawp mai.

Report ve reng reng ang

Inrinni zan Anfield-a inkhelah champion lai Manchester United chu an chak lo teuh hle a, si an phurh hnuah substitute Javier Hernandez-a'n an si phurh a sut hram a, Liverpool an draw a ni.

He inkhelah hian Liverpool captain, inhliam avanga inkhel thei lo char char Steven Gerrard chuan tun season-a a vawikhat nan a start a. Minute 68-naah free-kick atangin Liverpool hmahruaina goal a khung a, hun tawp dawnah Hernandez chuan an si phurh a rawn sut a ni.

2007 kuma 1-0 a an chak bak Mancheser United hi Anfield-ah hian chak lo zawkah an tang ziah a. Chu bakah si an phurh tawh hnuah Liverpool lakah hian point an la hmu ngai lo bawk a. Hei hi hre rengin Sir Alex-a chuan a attacking player tha tak tak - Wayne Rooney, Javier Hernandez leh Nani-te chu bench-ah a dah a. Rooney hi Euro 2012 qualifier-a a red card hmuh leh chumi avanga match 3 khel thei lo tura an hrem rilru na tur vengin Sir Alex hian a luhtir lo niin a insawi a. A nihna takah chuan Liverpool laka si phur hmasa lova, inven a ngaihpawimawh vang tih a lang reng mai.

Inkhelh chhung zawngin mual neitu Liverpool an chungnung zawk a, United hian a zawna Anfield-a chak loh awn awn an tum lo tih hriat takin defensive player an tlar hnem hle a, United keeper David de Gea a lang zing hle a, hun tawp dawn lamah phei chuan Liverpool substitute Henderson chuan goal chance vawihnih yha tak tak a nei a ni.

United tan Park Ji-Sung leh Ashley Young ten awmzia an neih hleih theih loh avangin Sir Alex-a chuan Nani leh Rooney-te a rawn tir lut a, hemi hnu lawk hian Gerrard chuan free-kick atangin goal a khung a. He goal a luh theih nan hian Ryan Giggs lo zuang zeuh kha a \angkai khawp mai! Mahse Sir Alex hian defender Phil Jones aiah striker fing Hernandez a rawn luhtir a, a tifuh a, an si phurh a rawn sut a ni.

Hun pek belhah Liverpool tan Henderson chuan chance tha zet zet vawihnih a thelh a. Martin Skrtel pawhin a thelh ho khawp mai. Inkhelh tawpah, point khat hmu rau rauvah United an lawm zawk ngei a rinawm.

Liverpool-ah attacking midfielder?

Liverpool chuan Celtic-a khel mek Ki Sung-Yeung chu January transfer hunah an la maithei.

Kum 23 a upa niin, South Korean a ni a. Rubin Kazan chuan nipui lai khan pound maktaduai 8 in an dawr a, Celtic hotute hian an hralh phal lova. Amaherawhchu League-ah bul an tan that vak loh avangin Ki-a hian nuam a ti lova, Liverpool-in an duh tih a hriat takah chuan Celtic manager Neil Lennon hian a dang zo lovin an ring.

Midfielder a ni a, a laiah lan mahse attacking rilru pu a nih avangin goal pawh a khung fo va. A siamsak thin bakah free-kick atangin goal a khung fo avangin Celtic hian an duh hle a, Glasgow ah chuan star lar tak a ni tawh a ni.

Liverpool sponsor-tu Standard Chartered hian Eastern Asia lam atangin player lakluh an duh thu hi an lo sawi tawh thin a. Club sumdawnna lam hawizawngin nasa taka hma lak tul an ti a. Meireles Chelsea hnenah an hralh a, Aquilani chu Italy lamah a nghet maithei bawk a, Liverpool hian sumdawnna lam lovah pawh attacking midfielder tha an duh ve reng reng a, January thla hian an dawr ngei a rinawm.

Season liamta khan Ki hian game 34 a khel a, midang tan a siamsak nual bakah long range goal a khung nual a, free-kick a thiam bawk avangin Premier League-ah hian khel chhin se titu an thahnem hle a ni.

Player Rinawm 10

Khawvela player man to ber emaw, to ber ber 10 zinga hming lang emaw han nih ve chu thil chakawm tak tur a ni. Chu mai chu ni lovin, mahni hun laia khawvela footballer hlawh hnem ber zinga han tel ve chu nuam deuh tur a sin! Chutiang boruak avang chuan footballer-te hian an rinawmna leh hmangaihna hmasa an bansa chawk a. Sum leh pai um lo pawhin ropuina an um tho tho a. Champions League champion medal leh Domestic League champion medal duhin an club an thlak fo. Chutiang khawvelah chuan rilru nghet, club sawn ve mai mai duh lo, club tana rinawm tlat hi an awm ve reng a. Chu'ng mite chanchin chuan sawi leh hriat a hlawh tlem a, ropuina leh sum leh pai umtute hming chu kan benga ri ring leh ri zing a ni fo mai. Sum leh pai leh lawmman chhe thei uma buai ve ngai lo player 10 i'n thlir chhin teh ang.

Steven Gerrard
He Kop Idol hi Russian billionaire-in a lei hnua club hausa tak ni ta Chelsea chuan nasa takin an rim a, vawikhat lai phei kha chu Liverpool a chhuahsan mai dawn emaw tih turin thawm a awm hman. Kum 2003 kuma Samy Hyypia hnen atanga captain banhren a rochun atanga Liverpool captain la ni ta char char Gerrard hian a duh em em Premier League trophy chu chawi thei lo mahse Liverpool hi Champions League leh FA Cup vawihnih a chawipui tawh a. Khawvela footballer tha ber zinga chhiar tel a ni. A long shot tha lutuk leh field chhunga player a ho khawm thiam avang hian khawvelin a hria a, Zinedine Zidane chuan, 'One of the best players in the world' tiin a fak.

Jamie Carragher
A naupan lai chuan Everton tantu a ni a, mahse Liverpool kawr sen a ngaina chho a, a nghet ta em em a ni. 1996 a Liverpool a zawm hnuah hnung lam a la hawi leh chhin lova. 2001 kuma Gerard Houllier-a hova Liverpool-in treble championan nih tum khan match 58 khelin, player tangkai ber zinga mi a ni. England tana khelh vanga Liverpool tana khelh ai chuan, Liverpool vanga England tana khelh loh a thlan thu mipui hriatah a sawi chhuak hial a, Liverpool tan vawi 600 chuang a inkhel tawh a ni.

John Terry
1998 kum atangin Chelsea player a ni a, an hlawhtlin lai ber hun, League champion vawi thum an nih leh FA Cup vawi 4 an champion-naah captain a ni. Sum leh pai um duh se, Chelsea-a a hlawh aia tam hlawh turin Manchester City zawm theihna remchang a nei, mahse a zawm lem lo. Defender tha a ni satliah lova, a thatzia sawitute chuan, 'defender-te defender a ni,' an ti tawp!

Ryan Giggs
Manchester United player zinga fak hlawh ber mai chu Giggs hi a ni ngei ang. Sir Alex Ferguson hi awm lo se chuan United-ah hian a khel kher awm love. Manchester City-ho 'School of Excellence' a zir thin a ni a. A kum 14-na pianchamah Sir Alex-a hian an Inah a len chilh a, a naupan laia a club tan em em thin United zawmna remchang a neih phah a, a ti fuh a, Sir Alex-a pawhin a ti fuh char char bawk.

Cardiff-a piang a ni a, Wales ram tan hlawhtlinna pet chhuak hlei thei lo mahse United-a a ropui em avang hian football history-a player hlawhtling ber zinga mi a ni ve chiang. Midfielder a ni a, season tinin United tan goal a khung ve ziah. Club pakhat player-in trophy a lak theih zawng zawng chu a la kim a ni ber mai.

Francesco Totti
Football tuipui zingah AS Roma captain ropui hi a hming hre lo kan vang ngawt ang. Striker hnung chiaha khel thin, attacking midfielder-a khel thei bawk a ni a. World Cup a chawi tawh a, mimal award sawi sen loh a dawng bawk. A hun zawng zawng Roma-ah a hmang a, he club tana goal khung hnem ber, khel hnem ber a ni a. A rualpuite zingah player tha ber pawla chhiar tel a ni a, Roma player ropui bera ngaih a ni.

Javier Zanetti
Argentinian ni mahse he pa hian 1995-a a zawm Inter Milan hi a chhuahsan duh reng reng lo. Wing-ah, ding leh veiah a tha em em a, midfielder pawh a ni tho bawk. Kum 38 a ni tawh a, Inter Milan-in UEFA Champions League, Serie A leh Supercoppa Italiana an lak kawp vek tum pawh khan captain a ni a, tunah pawh a la inkhel zel. Inter tan hian match 700 chuang a khel tawh a, Italian ni si lova Italian club tana khel hnem ber a ni a, Inter Milan tana khel hnem ber dawttu a ni mek bawk.

Alessandro Del Piero
Juventus player ropui leh captain a ni. 1993 atang khan Juve-ah hian a khel tan. Goal a siamsak thin a, amahin a khung bawk thin. A free-kick leh penalty pet thiam a larpui. Pele-a'n footballer dam lai zinga tha a tih 125 zingah a tel a, kum 50 chhunga European player tha, UEFA Golden Jubilee Poll atanga thlan zingah a tel bawk. Juventus tana goal khung hnem ber, match khel hnem ber a ni bawk.

Iker Casillas
1990 atangin Real Madrid-ah a khel tan a, 1999/2000 season atangin an goalkeeper rinrawl a ni chauh. A rang a, a fing a, khawvela goalkeeper (tuna khel lai) zinga tha ber a nih loh pawhin a dawttu a nih ring an tam hle. A inpekna leh club tana a khelh that em avangin Real Madrid chuan a damchhung atan contract an zawrh hial a! 2017 thleng Real Madrid tana khel tur a ni.

Carles Puyol
A sam kir leh sei avangin mi tam tak chuan phenglawng ham tham Kenny G nen inang an ti. Tlar hnung khawi laiah pawh a tangkai vek a, card a hmu mang lova, a inhliam khat em em bawk a, englai pawhin Barcelona team-ah hian a tel char char a ni deuh mai. Kum 17 mi lek a nih atangin Barca tan a khel tan a, lawmman lak theih zawng zawng a la vek tawh ti ila a sual lo hial ang. Inkhelhna hun a nei tam tawh lova, a chawlh hunah chuan Barca hian an la ngai ngawt ang.

Andres Iniesta
Hei pawh Barcelona player. Barcelona Youth Academy - La Masia atanga inzir chhuak, 2002 atanga Barca first-team tana khel ve tan hian 2004-05 atang khan Barca first-team a la chang char char a. 2009 a trophy 6 ngawt an lak tum te khan a tangkai tiah tiah hle. Pep Guardiola player duh ber zinga mi a ni tih chu Xavi nen midfield-a a dah dun reng avang hian a chiang khawp mai.

Everton Vs Liverpool Match Preview

Merseyside Derby an tih mai Liverpool leh Everton te inkhel, England a derby awm zawng zawng a friendly ber ang a an sawi kan hmu leh dawn a, he match hi a hmuhnawm tur a beisei ani.

 Team chhe lemlo tak Everton hi 2011 season ah hian 7 pts hmu tawhin table ah 10 na anni mek a, kar liamta mai khan Manchester City in 2-0 in an hneh hlim hlawl anihkha, chaklo zawn duh miahlo anni a, Liverpool tan hian zuam ngawt chi anni lovang, Liverpool erawh table ah 5 na ni mek in 10 pts annei mek a, Spurs in Liverpool game chhiat em em tum a 4-0 a an sawp hnu ah, LIVERPOOL hian 2-1 in Wolves an hneh zo hlim anihkha, kan insiamthat ngei ring ila, he match a team pahnih te inbei hi en a chakawm tawh khawpmai.

An inkhelh tawhna lam thlir thuak thuak ila, season liamta khan Goodison park ah ngei mai hian 2-0 in min hneh anihkha, Anfield lamah erawh 2-2 in draw ani thung a, tun tum chu kan chak ngei a ngai anih hmel. An pahnih game hnuhnung 10 ah hian LIVERPOOL an chungnung hret a, vawi 5 an chak a, vawi 2 in draw in, Everton vawi 3 an chak thung, Sawi hmaih miahloh tur pakhat chu an game hnuhnung 15 ah hian red card vawi 11 tehmeuh phawrh ani.

Kenny Dalglish Manager anihna hnuai Goodison Park a an inkhelh hnuhnun ber chu 1991 kum, FA CUP a 4-4 a an in draw na kha ani a, League ah, Goodison park a Dalglish hnuaia an khelh hnuhnun ber tum chu 1990 kha niin, Peter Beardsley a goal 2 hmang leh Ian Rush a goal 1 hmang in 3-2 a LIVERPOOLan chak ani.

Everton Player To Watch - Tim Howard

Howard hi a tha telh telh emaw tihtur ani a, tun season a game ah Everton tan vawi 13 zet save in, clean sheet vawi 1 a nei tawh bawk a, hetiang saves ropui tak tak hi Liverpool lakah a a entir thei anihchuan Everton a chhanhim in,  chakna chance hial annei thei ani.


Liverpool Player To Watch - Luiz Suarez

Ani hian Ajax atang a Liverpool a zawm hnuah khelhchhiat tum ala nei mang lova, a khelh apiang defender te tibuai tu, goal thuntu leh, goal siamsak tu ani thei deuh zel ani, tun season ah hian goal 3 thun tawhin Liverpool player pawimawh ber te zing a mi ani. Everton hian an ven uluk hle loh chuan a hnawksak ber pawl tur ani ngei ang.

He game hi 1st Oct. 2011 (Saturday) zanah khelh tur ani.

King-in Carroll a chhan

Liverpool manager Kenny Dalglish chuan tun hnaia England coach Fabio Capello-a'n Andy Carroll a sawisel chungchangah a striker hi a chhan.

    Capello hian Carroll hi player tha tak a nih thu sawiin, a zu indan a siamthat a tul nia a hriat thu leh midang zawng aia in tlem a mamawh nia a hriat thu a sawi a. Mahse Dalglish chuan Carroll hi tanin, "A fitness hi teh ula, midang aiin a tha fe zawk ang. A nunphung hi in duhdan leh tha in tih zawnga hmang tur a ni pawhin ka hre lo," a ti hmiah mai!

    Liverpool player leh boss hlawhtling em em, King Kenny chuan, "Andy hi season liamta khan a khup na avangin a in fit tawk lova. Mahse kuminah hian a khup na hi a dam tawh avangin a fit tha tawh a ni," a ti bawk.

    Dalglish chuan Carroll chu mi tha tak a nih thu sawiin, "Andy hi fuihna thu zawm thiam tak a ni a, football lamah kher kher phei chuan thuawih tak a ni. Fabio Capello fuihna leh thurawn pawh hi a zawm ngei ka ring," a ti bawk.

    Kum 22 a upa Carroll hian Newcastle atangin kumin January thla khan Liverpool hi a zawm a, goal thum a khungsak tawh a. Tun season-ah, Carling Cup-ah goal khat a khung bak chu League-ah goal a la khung lo a ni.

    Hetih lai hian Dalglish chuan transfer hun tawp dawn tepa an lakluh player pahnih - Craig Bellamy leh Sebastian Coates-te chu Stoke khel tura an fit thu a sawi a. "Sebastian hian Copa America kha a khel tha em em a, Young Player of the Tournament-ah an thlang hial a. Kan lei to lovin kan hria, a chhan chu Alexis Sanchez (Chile) pawh Barcelona-in pound maktaduai 40 velin an lei a nih kha! Ani kan nei hi kan lawm a, kan zinga tha taka khel tur hian hun a duh rei ka ring lo. Craig (Bellamy) pawh a lo let leh hi a hlim a. He club tana khelh a duh avang hian a hlawh pawh a tihniam ngam a ni a, chuvangin he club tan hian thahnem a ngai ngei ang tih kan ring a ni," a ti bawk.

Kum thum hnuah Leader kan ni ve ta e!

Inrinni zan Premier League inkhelah chak tura rin Liverpool leh Chelsea te an chak a. La chak zawn Wolverhampton erawh an chak zawn thei zel ta bik lo.

Anfield-a inkhelah Liverpool chuan 3-1 in Bolton an lo hneh a. Tun nipuia an player lei thar Jordan Henderson leh Charlie Adam te chuan an club thar tana goal khatna an khung ve ve a. Martin Skrtel chuan kawh pawtin a head goal bawk a. Hun tawp dawn ah Bolton hian Carragher-a tihsual nangchingin Ivan Klasnic hmangin goal an khung ve hram.

He inkhelah hian a tir atanga a tawp thlengin Liverpool hian chan tha zawk an chang char char a. Tlar hmaah Luis Suarez a hlauhawm thei hle a, midfield-a awm Adam leh Henderson te bakah Lucas Leiva a tangkai leh hle a. Wing-ah Downing pawh a hnawk thei hle a, Bolton defender-te an hah a, referee kha ni dang ang chu ni se Liverpool hian goal an khung nual maithei.

Inkhel a zo va, kum thum chhunga a vawikhat nan Liverpool chu table chungnung berah an awm ve leh ta a. Mahse Chawlhni zana Manchester City leh United te inkhel result a zirin Liverpool hi table chung atanga paihthlak an ni thei.

Chelsea pawh kai thar Norwich lakah dinhmun tha vak lova an awm reng hnuin 3-1 in an chak leh thei a. Amaherawhchu Didier Drogba erawh hun rei tak chhawr theih lohvin a awm hmel khawp mai.

Kum thum deuhthaw goal a khung tawh loh hnuah Jose Bosingwa chuan Chelsea tan goal rawn khungin hma an hruai a. Amaherawchu Grant Holt chuan Norwich tan goal khat khungin an si phurh a rawn sut ve leh a. Hun tawp lam thlengin goal an khung thei lo dun a. Drogba chu Norwich keeper John Ruddy nen an inchuhnaah a tla sual a, oxygen pek ngai khawpin a awm a, field atangin zawn chhuah a ni a. Mahse hemi hnu hian Ruddy hian Ramires a tihtluk avangin red card pek a ni a, Frank Lampard chuan penalty atangin goal a khung a. Goal khung thei lo Fernando Torres chu an rawn thlak a, Spanish player an lei thar Juan Mata chuan hun tawp dawnah goal a rawn khung a ni.

Ewood Park-a inkhelah second half-a penalty vawihnih an hmuh an pet goal theih loh avangin Blackburn chuan Everton lamah goal an khung lova. Everton chuan injiry time-ah penalty an hmu a, Mikel Arteta chuan a pet goal ta si a, Everton an chak daih a ni.

Liberty Stadium-ah Wales club Swansea chuan an chance neih zozaite an hman tangkai theih loh avangin an mikhual Sunderland an hneh zo lova, goal awm lovin an in draw a. DW Stadium-ah Wigan chuan kai thar QPR chu 2-0 in an lo hneh thung a. Game hnih chak zawn tawh Wolves pawh Aston Villa chuan goal awm lovin an lo draw bawk.

Liverpool Transfer thu thar

Liverpool chuan Manchester City-a khelhna hmun chang tawh lo, an player hlui Craig Bellamy chu an striker-te thlawptu turin an la fel tep a, Manchester City hian a thlawna chhuahtir tawp an pawiti ta lo a ni awm e.

Kum 32 a upa ni ve tawh Bellamy hi Roberto Mancini chuan a team-ah a telh duh tawh lova, mahse City atanga a chhuah loh chuan, inkhel miah lo pawh ni se kar khatah pound 95000 a hlawh ve reng tho a. Hemi avang hian a thlawna chhuahtir pawhin an la hlawk zawk dawn a, chhuahtir hi an phal ta tho niin a lang a, a chhuah chuan player hlawha an hman a tlem phah sawt dawn a ni.

Liverpool-a khel tawh Bellamy hi striker chhia a ni lova, amaherawhchu a thin a chhia a, buaina siam a chin avangin khawi club-ah mah a tuitla hlei thei lova. Liverpool-ah pawh khan a khel chhe hran lova, mahse Rafa Benitez nen khan an inhmu thiam lo a, chu bakah a teaam-mate John Arne Riise kha Golf vuaknain a vaw vel a, a chhuah phah ta a nih kha. Liverpool boss thar Kenny Dalglish chuan Bellamy hi a striker pahnih Suarez leh Carroll-te chhawktu turin a duh a, mahse a mana sum sen a duh lova, City hian a man atanga sum tlem tal lakluh duh mahse a duhtu awmchhun Liverpool-in pawisa pek an duh si lova, 'A hlawh kan pek loh dawn chuan a tawk alawm,' an ti lo thei ta lo a ni.

Hetiang a nih lai hian Bellamy hi Tottenham leh QPR pawhin an duh niin sawi thawm a awm a, mahse Liverpool-a kal hi a duh ber nia sawi a ni bawk a. Liverpool hian kum khat daih contract an ziahpui rin a ni.

Hetiang a nih lai hian Liverpool hian an striker David Ngog chu Bolton lamah an hralh dawn niin sawi a awm a. Midfielder Alberto Aquilani pawhin season khat chhung AC Milan-a khel turin medical a paltlang tawh a ni awm e. Aquilani hian tun season chhung hian Milan tan game 25 a khelh tlin theih chuan season tharah Milan player nghet ni turin a inziaklut thei dawn a, a manah Milan hian Liverpool hnenah pound maktaduai 7 an pek a ngai dawn a ni.

Enrique a lo lût dawn

Newcastle chuan Jose Enrique chu kawl zel tum teh mahse an thei ta lova, Liverpool lamah a kal dawn ta niin The Mirror chanchinbu chuan a ziak a, Liverpool hian pound maktaduai 5 in an lei dawn a, tun kar chhungin an inleina hi an tifel dawn niin an ziak.

Tlar hnunga talbuai mek Liverpool hian Spanish lef back hi an helna a rei tawh a, mahse Newcastle hian an dang tlat a. Mahse amah hian Newcastle-ah a contract a pawhsei duh tak loh avangin an beidawng ve ta ni a hriat a ni a. Tuna an chhuahtir loh chuan season tawpah man nei lova a chhuah a ngai dawn a, chu chu an ngai ngam lova, pawisa an hmuh theih laia chhuahtir mai thain an hre ta a ni.

Kum 25 a upa Erique hi Kenny Dalglish chuan August ni 13-a Sunderland nen Premier League an khelh huna chhawr hman ngei tura a lei beisei a ni a. Report thenkhatah chuan Erique-a man atan hian Liverpool chuan pound maktaduai 8 vel sen an inhuam a. A tirah pound maktaduai 6 pein, a khelhdan azirin pound maktaduai 2 dang Newcastle hi an pek belh leh dawn ni a sawi a ni thung. Hetih lai hian Serbian winger Milan Jovanovic chu Belgium club Anderlect lamah a lut dawn tih a chiang tawh a. Inremna nei tawhin, vawiin hian medical a nei dawn ni a sawi a ni.

Premier League fixture for Liverpool FC - 2011/12 Season

AUGUST:
13 - Sunderland (h)
20 - Arsenal (a)
27 - Bolton Wanderers (h)

SEPTEMBER:
10 - Stoke City (a)
17 - Tottenham Hotspur (a)
24 - Wolverhampton Wanderers (h)

OCTOBER:
1 - Everton (a)
15 - Manchester United (h)
22 - Norwich City (h)
29 - West Bromwich Albion (a)

NOVEMBER:
5 - Swansea City (h)
19 - Chelsea (a)
26 - Manchester City (h)

DECEMBER:
3 - Fulham (a)
10 - Queens Park Rangers (h)
17 - Aston Villa (a)
20 - Wigan Athletic (a)
26 - Blackburn Rovers (h)
31 - Newcastle United (h)

JANUARY:
2 - Manchester City (a)
14 - Stoke City (h)
21 - Bolton Wanderers (a)
31 - Wolverhampton Wanderers (a)

FEBRUARY:
4 - Tottenham Hotspur (h)
11 - Manchester United (a)
25 - Everton (h)

MARCH:
3 - Arsenal (h)
10 - Sunderland (a)
17 - Queens Park Rangers (a)
24 - Wigan Athletic (h)
31 - Newcastle United (a)

APRIL:
7 - Aston Villa (h)
9 - Blackburn Rovers (a)
14 - Fulham (h)
21 - West Bromwich Albion (h)
28 - Norwich City (a)

MAY:
5 - Chelsea (h)
13 - Swansea City (a)



*h = Home; a = Away
*Fixture hi tulna avangin tih danglam theih ani.

NGHET TLAT

By : RCha Tochhawng (Posted at Facebook Liverpool Group)

Hman deuh hlek tawhah khan Liverpool FC hi engvanginnge kan la tan reng mai le tiin ka thiam ang tawk tawkin ‘sap’ tawngin ka lo thai lang ve tawh a; mahselangin ka rilru ah hian he football club hi a awm reng mai bawk si a, nitin mai hian he club chanchin ngaihven leh lunglen tharna tur zawngin ka hun ka hmang thin. A chang phei chuan ka Lal leh Chhandamtu Lal Isua Krista lakah hian Liverpool ka buaipui lutuk hi ka inthlahrung thin a, ngaihdam ka dil fova amaherawhchu Aman min pek ve ni hian ka ngai bawk a ka inthiam ve leh thin bawk.

Football kan hriatthiam ve tan leh kan tui chhoh ve tan lai(1980’s chawhnu lam hret) khan TV a inkhel ‘live’ a en tur a vang thin hle a, India rama club tha ho Mohun Bagan te, East Bengal te leh Mohammedan Sporting ho inkhel te leh Bangladesh lama eng tournament(men) emaw en tur tlem azawng a awm ve thin a, Bangla tawnga an ‘commentary’ te kha rilru ah hian a la cham reng mai. Chutih hun lai vel bawk chuan Bangladesh TV ah bawk khan FA Cup replay te en tur a awm ve thin a, tin English League inkhel te pawh ‘replay’ hmuh tur a awm ve thin. Khang hun lai khan kan hmuh leh en ve theih china en manhla ber inkhel a ropui ber mai thin chu Liverpool FC an ni a, England ram football atchilhna rama roreltu te chu Liverpool an ni. Football thiam leh khel hmuhnawm, chak reng mai thin te kha chu tan an nuam a, tan man pawh an awm. Tin an thawmhnaw a lo sen kher bawk nen mit an la thin kher mai; chu chuan rilru a hneh a, kawrsen ha ho chuan thinlungah hmun an luah nghet chho ta viau mai a. Zosap te zinga ka piancham ka tawmpui, ka ngaihsan em em thin Pi Teii thusawi leh chanchin ziahna ah te khan ‘missionary’ tura an lo chhuah dawn a an training na hmun an tarlan leh sawirik fo chu Liverpool khua hi a ni a. ‘The Beatles’, ka nu te, ka putea te hovin an ngaihsan em em thin ho lo chawrchhuahna khua Liverpool pawh kan hre chamchi thin. Heng zawng zawng avang hian ni maw Liverpool chu ka intitatu chho viau a. Football tuina a lo mumal telh telh bawk nen, tan dan awmze neiin(han ti ve rawk ila) chu khaw club, a khaw hming chawitu Liverpool FC chu ka lo tan ta em em mai a ni.

English football en tur mumal awm reng lo mahsela rilru ah chuan Liverpool chu a awm reng thin. English Premier League ‘live’ a en tur an awm tak atang phei kha chuan rilru, thinglung leh taksa lam a phur chho leh ta zak a. An inkhelh hnu a kan en ve chauh thin kha an inkhel lai ngei ngeiin kan hmu thei ta bawk a nuam danglam tak a ni. Beiseina sang tak nen ka football club, ka lungdumtu chu ka lo thlir thin a, ka hriattirh a an awmna ah khan awm leh mai tur hian ka ringin ka beisei thin a mahselangin hun a lo inher a, thil a lo danglam nasa ta ani ang, a awl ai ta lo viau mai. Teuh in kan tham leh fo thin. English club zawng zawng, Liverpool FC in ‘records’ a lo siam umtu te ni vek si khan an chetthat lai a ni si a, kan nawi fo si thin nen, elsenna tawngkam chu kan hriat a ni fo ta reng a. ‘Hmanlai, ‘history’ bak Liverpool tantute chuan sawitur in nei lo’ , tih te chu heng ho thunawn a ni thin. A awm viau, mahse history hian tun hi a thlen a, tunhma a kan thiltih leh awmdan ten tuna thil awmdan leh nihdan hi a thlen thin a, a pawimawh a ni tih an hrethiam lo a ni mahna le….Lamartine-a sawi – ‘History teaches everything including the future’ tih a sawi te, Cicero an – ‘To remain ignorant of things that happened before you were born is to remain a child’, tih a sawi te pawh an hriat ka ring lo. Ram te, hnam te pawh hi an history hian a tinung fova, a ti phur a, a ti ropui thin a. Khawvel hi chu inentawntlang leh inzir tlang vek kan ni a, a tha leh a dik, a ropui lai chu entawn a , tih ve, nih ve, neih ve kan duh thin; chutiang bawk chuan English football a club zawng zawng te hian Liverpool nihna leh nihphung te, tunhma a ropuina an lo chan tawh kha chan ve duhin an um duai duai hlawm chu a ni si a.

Winston Churchill-a pui khan – ‘A love for tradition has never weakened a nation, indeed it has strengthened nations in their hour of peril’, a lo ti a, Liverpool Football Club in ‘traditions’ a neih thatzia leh nghehzia kan hria. Heng kan chindan than, tihdan leh ze nghet te hi a ni hun harsa leh hrehawm karah pawh min tichak thin tu chu. Hun rei tak, kum tam tak ‘champion’ tawh lo mah ila, kan chak loh lai ber pawhin – ‘ When you walk through a storm, Hold your head up high, And don’t be afraid of the dark, At the end of the storm, There’s a golden sky…….Walk on, Walk on With hope in your heart And You’ll Never Walk Alone’ tiin kan kal zel thin a. Hetiang reng renga ze nghet pai ve football club hi awm ve tak maw? Chin dan than leh mumal na nei lo mihring, ram leh hnam pawh, ropui leh entawntlak an awm ka hre ngai lo. Thli in a chhem thlek va mai mai loh kan nihna tak te hi a ropui ka ti thin. He ramah ngei pawh hian Liverpool tantu te hi chu kan nghet chu a nih hi. An ropui lai tem pha ve, luhlul vang pawh a ni mahna tan tlat tute hi awm mah ila, kum naupang zawk, Liverpool FC English champions an nih hnuhnun ber pawh hre mumal ve lo ten an tan tlat mai hi chu a ropui ka tiin mak ka ti fo thin a, an fakawm ka ti a, Liverpool tantu ka ni ve hi nasa takin nuam ka ti zual thin. Club dang tunlaia che tha ho hi han tlahniam ve ta ruai ruai mai se, “ ‘Ka tan, ka tan bur’ ti fo ho hian engtia rei nge an tan ang aw”, tiin ka ngaihtuah fo thin. ‘Liverpool Way’ kan tih te hi a va hlu em, hei hi enge tiin inzawt ila thil pakhat han sawi fak tur a awm awm love mahse kan nei si. Anfield a rawn inkhel club dang, veng neitu ten an lo dawnsawn that thinzia te(Manure an nih loh chuan), kan player hlui te kan zahthiam leh kan chawimawi thiamzia te, kan player te kan ‘boo’ ve ngai mang lo te(El Hadji Diouf-a kha chu a harsa deuh chu a ni), kan manager hlui te kan ngaihhlut zia te, kan player te lemchang tura kan duh ve lohzia te, ‘fair’ lo taka khel tura kan duhlohzia te; kan captain Steven Gerrard-a ngei pawh first team a a rawn khelh tirh khan a khel ‘rough’ fua fua thin viau a, ‘fans leh supporter’ lam te pawhin an sawisel mai a nih kha. Reserve team te inkhelh na ah player pakhat chu referee thuthlukna ah a lungawi lova, a ang chiam a, mahse an ‘coach’ in ‘khatiang kha kan tih dan a ni ve lo’ tiin a zilh e an tih chu(hei hi hmanni deuh khan ka chhiar a, mahse a mihring a te, an khelhpui te leh thil dang hi chiang takin ka sawi mai thei ta lo). Ka sikul luh thinna a kan principal in ‘Play Hard, Play Fair’ tiin min hrilh thin a, chu chu Liverpool ah hian ka hmu a ni.

Tuna Football a nihdan hmuchhuaktu inti ram England a ‘standard set’ tu, Europe thleng pawha ropui em em(Heysel stadium a thilthleng vanga kum 6 ngawt Europe intihsiakna a tel thei lo tura tih ni lo phei ila chuan tuna vawi 5 aia tam hi kan champion ngei ka ring), kawng engkima entawn leh el rawn LIVERPOOL FC tantute zinga ka tel ve hi ka va han lawm tak em. Tunah ‘King of the Kop’ Kenny Dalglish’an a hna chawlh lailawk san a rawn zawm leh tawh bawk si – ‘Pass and Move, Pass and Move, It’s the Liverpool Groove’ , tiin kan hma lam hunah football kan pet leh dawn ta bawk si, a va nuam dawn em…..season thar hi tan vat vat se aw……….

Tute Nge Kan Lak Ang? (Kan kal dan a dik em?)

Transfer hun a inhawng chho dawn a, tu tu nge kan lak dawn tih hi kan ngaihven tlang hle awm e. Kan pu (Dalglish) hian ama style-in, Liverpool-ah hian English thisen kai ngei player, a tam thei ang ber lakluh a tum leh mek a. Hei hi he Liverpool club hian a thatpui ang em? Manager berin a manage thiam tur, English (tawng) duhtawka engkim a sawipui theih tur player a thlang hi amah berin a duh dan a nih chuan a that ngei kan beisei thei ang em?

Tun dinhmunah kan club nen hian player engemawzat sawi zawm an ni mek a. A hnuhnung berah chuan Wigan midfielder James McCarthy, pound maktaduai 10 man vel tur hi a ni. McCarthy hi Glasgow (a hming hi ka chhut sual ve ziah, 'Glascow' tih a awl! lolz.) a piang a ni a. English chu an inti chiah lo ang a, mahse keini leh khawvel ngaih chuan 'Sap dik tak' an ni. (Kenny pawh hi a ni tho em?)

Liverpool hian tlar hma sira tlan tur, wide-man pahnih tal, central midfielder pakhat, left-back leh centre-back pakhat ve ve tal tun player insuan hunah hian lei an tum a, thei tak maw?

Aston Villa star Ashley Young hi kan target no. 1 a ni a, chutih laiin Reenes atangin Sylvain Marveaux chu free transfer-in a lo kal thut maithei bawk a. Attacking midfielder, Lille-in £20m an chhiar Eden Hazard kan hel mek bawk a. Mahse ani hi chu club dang pawhin an hel nasa khawp mai.

Bolton centre-back Gary Cahill leh Blackburn star Phil Jones pawh kan melh mek a, chutih lai chuan Newcastle star Jose Enrique hi left-back ah chuan kan pute lung dum ber a ni rihin an sawi.

Tih theih kan nei tlem hle na a, duhthu erawh kan sam ve thei tho ang chu. Duhthu han sam teh u.

Liverpool FC Profile Overview

OVERVIEW

Liverpool have maintained their status as a domestic and European force since the Premier League began in 1992, rarely finishing outside the top positions. The club have won seven major trophies since then, including the Champions League, Uefa Cup, two FA Cups and three League Cups. Indeed, 2001 saw the Reds claim an unprecedented League Cup, FA Cup and Uefa Cup treble. Under Rafa Benitez, Liverpool secured Champions League football in five of his six seasons at the helm. The Spaniard won the competition in 2005 and guided the club to an appearance in the final two years later where they were beaten 2-1 by AC Milan. After struggling in the 2009 /10 Barclays Premier League season the club finished in seventh, and missed out on a Champions League place. They will instead take part in the Europa League in the 2010 /11 season. On 3rd June 2010 , Liverpool announced that they had parted company with Benitez, and Roy Hodgson took over later that summer.

CLUB HERITAGE

In 1891 , John Houlding purchased Anfield after Everton left the ground for Goodison Park following a seven-year tenancy. With an empty stadium and only three players remaining, Houlding formed Liverpool Football Club on 15th March 1892. Everton FC and Athletic Grounds, Ltd, or Everton Athletic was to be the name, but the Football Association refused to recognise the team as Everton. Liverpool's first-ever competitive match was in the Lancashire League, where a predominantly Scottish team defeated Higher Walton 8-0 on 23rd September 1892. Liverpool won their first title in 1901 after gaining promotion to the First Division in 1894. The appointment of Bill Shankly in 1959 was the beginning of a golden era for Liverpool. He led the club to promotion to the First Division in 1962 and they have stayed there ever since. The title was secured in 1964 and 1966 , with a first-ever FA Cup final victory sandwiched in between. A year after winning the Uefa Cup, Shankly retired and was replaced by his assistant Bob Paisley. Within two seasons, the Reds had won the league, and the Uefa Cup for a second time. Paisley's nine-year reign saw Liverpool win 21 trophies, including three European Cups, six league titles, a Uefa Cup, and three League Cups. Joe Fagan took over in 1983 and inspired the club to the European Cup, League title, and League Cup in his first season.

PREMIER LEAGUE HISTORY

1993 /94 - Roy Evans replaces Graeme Souness
1994 /95 - Win League Cup
1998 /99 - Gerard Houllier joins Evans as joint-manager
1998 /99 - Houllier takes sole charge in November 1998
2000 /01 - Win FA Cup, League Cup and Uefa Cup
2002 /03 - Win League Cup
2003 /04 - Houllier departs by mutual consent in May 2004
2004 /05 - Rafa Benitez takes over
2004 /05 - Djibril Cisse joins from Auxerre for a club record £14m
2004 /05 - Win Champions League
2005 /06 - Win FA Cup
2006 /07 - American businessmen George Gillett and Tom Hicks become owners in a deal worth £470 m.
2007 /08 - Fernando Torres becomes Liverpool's record signing at an initial fee of around £20.2 m from Atletico Madrid.
2008 /09 - Benitez ends widespread speculation about his future by signing a new five-year contract.
2009 /10 - Benitez leaves Liverpool by mutual consent.
2009 /10 - Roy Hodgson takes over  

Burton Kan Duh Ang Em?

Ka sawi tawh a, ka sawi zel maithei. Kenny Dalglish hian Liverpool team-ah hian chak duhna thinlung a rawn tuh niin ka hria. Houllier-a leh Benitez-a hnuaiah khan kan player-te khan 'chak duhna tak tak thinlung' an nei lovin ka hre thin a. Sorkar hnathawk zelthel, hlawh lak nan chauhva thawk ang hi ka tehkhin thin. Hemi chungchangah hi chuan Sir Alex Ferguson-a hi ka fak. English an ni emaw ni lo emaw, a player lakluhte thinlungah hian Manchester United hmangaihna a tuh tlat thei zel a. Chak hi an tum em em niin ka hmu thin - ka awt thin.

Fernando Torres-a pawh kha player tha chungchuang a ni tih ka pha lo. Mahse, engemaw chang kha chuan a thatchhia a. Box chhungah a hlauhawm viau rualin, box chhung panna tura ball khalh kha a thatchhia a. Ball a zawng peih lo leh tlat thin.

Manchester City-a a khelh lai atang tawh khan Joey Barton-a talent hi ka awt tawh. A thinchhiat a reh ve tan atang phei hi chuan ka awt takzet. Tun season-a, Carroll-a kan lei hma, nikum December thla 3-1 a min hneh kha i la hria em? Khami tuma Barton-a ball sem thatzia kha i lo hmu ngei ang. Khami tumte khan, a thinchhiat chhuak se, red card hmu se ka ti khawp a. Chuti a hnehin, a khel tha em em tluanchhuak zak a nih kha.

City atanga pound maktaduai 5 leh nuai 8 in an lei kha Newcastle hian an hralh phal kher lo maithei a. Mahse an hralh phal loh hi lei theih loh an ni kher lova. Carroll pawh kan leisak mai kha.

Tunah hian Kenny Dalglish hian Barton hi pound maktaduai 5 velin lei a inbeisei niin sap chanchinbute chuan an ziak a. Hetiang zat leka a lei thei a nih chuan kei, ka duh khawp mai. Kum 28 a upa, fit nga leh inchi sawmpakhata sang, chak leh ball thiam si, English a nih mai bakah, Liverpool-a piang a lo ni kher kher hian ka duh a tizual a. A talent hi kan hman tangkai theih ka beisei a. Carroll-a nen an inmanzia kan hria a, Carroll-a'n Newcastle tana goal a khung zinga pariat kha Barton-a siamsak hi a ni tlat.

Dalglish hian Blackburn player Phil Jones te, Blackpool captain Charlie Adam te, Aston Villa player Ashley Young leh Stewart Downing te bakah Ipswich-a khel Connor Wickham te a beisei mek niin an sawi bawk a. Liverpool-ah hian English player hlir khelhtir a tum deuh emaw tih hial tur a ni.

Season thar bul kan tan hmaa player paruk vel kan lei thei a nih a, tuna kan beiseite hi kan lalut thei a nih chuan season tharah chuan kan tawrhhlelhawm ve viau maithei a ni.

Lawmna Tur A Tam Ta E!

Liverpool tantu nih hi hahthlak tih chang ka nei fo. Zahthlak erawh ka la ti chhin ngai lo.

Gerard Houllier-a hnuaiah khan Manchester United khan min hneh thei mang der lova. Season tin mai khan Home leh Away-ah kan hneh deuh ziah mai a. Mahse tun hnuah hian kan hneh hlei thei ta tlat lo. Kan hneh thin lai kha chuan Arsenal pawh an champion ve thin a nih kha. Keini hunah hi chuan Liverpool hian Premier League champion kan hnaih khat hle a. Eng kum nge, ka hre tawh lo (History hi ka major subject chu a ni ve a, mahse kum leh thla tih vel hi ka chhinchhiah thei der lo!), point 11 in hma kan hruai a, inkhelh a tlem tawh hle bawk a. Champion thawkin kan thaw vel tawh a nih kha. Mahse mak tak maiin Manchester United khan min rawn lehpel leh a nih kha.

Benitez-a hnuaiah khan kan champion thelh a. Draw result kan ngah luat kan tuar lo a nih kha.

Kha bak kha chu beisei hi kan nei sang khat em em. 'Season a tawp ang a, palina hnuai lamah chuan kan awm leh chuang lovang,' kan ti kum tin ringawt mai a ni. Mahse, chu pawh chu season liamta atang khan kan tawngkam a ni leh phak tawh lo. A hah chu a hahthlak a sin!

Zahthlak lek lek khawpin tun season-ah kan che chhe chho va. Roy Hodgson-a hnuaiah khan beisei nei takin kan awm a, beiseina erawh a chuai raih raih a. King Kenny a rawn lut a, thil a danglam tan a ni.

Kenny Dalglish-a hian a naute hi a enkawl thiam tih chu an result atang hian a hriat khawp mai a. Chu mai bakah, Arsenal nen an inkhelh a, player naupang zawk tirh luh a ngaih tawha a tirh luh dawna a hmelte kha i lo hmu em? A player tirh luhte lakah khan pressure a siam miah lova. Nui sangin, 'Nuam deuhvin va khel rawh,' ti ni awm fahranin a tir lut a nih kha. Kan lo hlauhthawn ruk leh beisei angin an khel lova, ropui takin an khel zawk a nih kha.

Game khat khelh that te, game khat khelh chhiat te hi chu mihring zingah a awm thin a. Kan player naupangte pawh khan Arsenal an khelh tum kha an khelh that tum a ni ang tih ka la hlau cheu a. Mahse hlauh ang a ni lo. Birmingham, kan hneh loh khut tawh kha - kan han khel leh a. Jay Spearing te, Flanagan te, Robinson te inkhelh thiam zia kan hmu a, an rintlakzia a takin kan hmu leh ta a ni.

King Kenny chuan, ' Dan naranin, naupang zawkte tan hian tha taka khelh hi a harsa a. Vanneih a ngai em em a ni. Kan naupangte hi an vannei a, football khel turin hun leh hmun tha an nei hi an vannei takzet a. Kan Academy-in player min pekte hi hun remchang siamsak zel kan tum a. Player naupang rawn tha chho hian first team player-te pawh a ti tang thei bawk a ni,' a ti.

Ni e. Luis Suarez hian goal a khung loh pawhin player tha a nihzia a lantir reng a. Dirk Kuyt pawh a tha tawlh tawlh mai. Tlar hnung leh field lai pawh tunah chuan 'tah an ti chhuak' tawh bik lo.

Hmanah kha chuan Gerrard, Carragher leh Torres te tel lova chak thei lo Liverpool kan ni thin. Mahse tunah chuan Torres kan nei tawh lova, Gerrard a inhliam bawk a; Carragher pawh tun hma angin a tuan a rang tawh lo. Mahse tuna Liverpool team hi player pahnih khatah a innghat tawh lova. Khawi hmunah pawh kan player neihte hi chak duhna thinlung pu an nih tawh avangin an rintlak tawh a, kan chak kan chak ta zawk niin ka hria. Kei chuan, season thar hi beiseina TAK TAK nen ka thlir a ni.

Birmingham nen kan inkhel a, Joe Cole, minute 84-naa rawn lut pawhin goal khat a rawn khung kha ka lawmna tizualtu a ni. English player zinga ka duh ber 5 thlang ila ka thlan tel ngei ngei tur Joe Cole hian Liverpool tan thil ropui a tih chhoh zel ka ring tlat.

Tin, hmanni lawkah Boston-a hmun nei, 'Warrior Sports' nen 'Kit Deal' thar kan nei bawk a. 2012/2013 season atang chuan kum khatah he mite hian pound maktaduai 25 min pe ziah dawn a. Hei hi Manchester United-in Nike nena contract an neih aiin pound maktaduai 1.5 in a sang zawk nghe nghe a. Liverpool hma lam hunah hian THIM ni lovin, ENG a awm niin ka hria. Chutih hunah chuan, tuna United, Real Madrid leh Barcelona tih lohva Jersy ang (replica) hralh hnem 4-na kan nihna pawh hi kan inchawisang chho ang a, a hralh tam ber pawh kan la ni chho ang tih hi ka beiseina a ni.

Lawmna tur a tam tan ta takzet e.

January Transfer-a Liverpool Sulhnu

LUT THAR-TE:
Luis Suarez – £23m .Ajax atang
Andy Carroll – £35m . Newcastle atang
Jason Banton – Free .Blackburn atang
Yusuf Mersin – Undisclosed. Millwall atang
Conor Thomas – Loan.Coventry atang.Summer ah permanent thei.

CHHUAKTA-TE:
Fernando Torres – £50m.Chelsea ah
Ryan Babel – £6m .Hoffenheim ah
Andras Simon – Chhuahtir tawp
Charles Itandje – Free. Atromitos ah

LOAN CHHUAH-TE:
Paul Konchesky – Nottingham Forest ah. Season tawpthleng
Stephen Darby – Notts County ah. Season tawpthleng
Chris Mavinga – Genk ah. Season tawpthleng
Nathan Eccleston – Charlton ah. Season tawpthleng
David Amoo – MK Dons ah. Thlakhat chhung


THIS IS ANFIELD

YOU WILL NEVER WALK ALONE